МЭНДЧИЛГЭЭ

2024 онд Монгол улсад Уул уурхайн салбар үүсч хөгжсөний  102 жил, Уул уурхайн салбарт дээд мэргэжилтэн бэлтгэж эхэлсний түүхт 50 жилийн түүхт ойнууд болж өнгөрлөө. 

1950-иад оноос Уул уурхайн олборлох, боловсруулах үйлдвэрүүдийг шинээр барьж байгуулан ашиглалтанд оруулах, хүчин чадлыг нь өргөтгөх зорилгоор хийгдсэн зураг төсөл, ТЭЗҮ-ийг боловсруулах ажил өсөн нэмэгдэж, уул уурхай, эрчим хүчний үйлдвэрүүдийг шинэчлэн өргөтгөх, орон нутгийн нүүрсний уурхайнуудыг шинээр барьж ашиглалтанд оруулах нөр их ажил өрнөсөн билээ.

БНМАУ-ын СнЗ-ийн (хуучин нэрээр) 1959 оны 09 дүгээр сарын 21-ний өдрийн 377 тоот тогтоол, 1959 оны 11 дүгээр сарын 02-ны өдрийн Аж үйлдвэрийн Яамны сайдын 531 тоот тушаалаар тус яамны хөрөнгө оруулалт, их барилгын хэлтсийн дэргэд 11 хүний бүрэлдэхүүнтэй группийг байгуулснаар уул уурхайн хүрээлэнгийн анхны суурь тавигдсан юм.

Өнгөрсөн 60 гаруй жилийн түүхэн хөгжлийн  хугацаанд ШУТИС-ийн харьяа Уул уурхайн хүрээлэн нь Улсын захиалгат эрдэм шинжилгээний төсөл 130 гаруй, аж ахуйн гэрээт эрдэм шинжилгээний ажил 1300 гаруй, уул уурхайн үйлдвэрүүдийн ТЭЗҮ, зураг төсөл 560 гаруй, 110 гаруй орд, 50 шахам уурхайн нүүрсний чанарын шинжилгээ, стандарт боловсруулан давхардсан тоогоор 350 гаруй  ордын чулуулгийн физик-механикийн шинж чанарын судалгаа хийж гүйцэтгэсэн бөгөөд шинэ бүтээл 20, ашигтай загвар, зохиогчийн эрхийн гэрчилгээ 100 гаруйг авсан байна.

Өнөө үед манай хүрээлэн нь Уул уурхайн салбарын 100 жилийн түүхэн хөгжлийн явцад Монгол улсын Уул уурхайн салбарын хөгжилд жинтэй хувь нэмэр оруулж, түүхэн үүргээ нэр төртэй биелүүлж байна.

Монгол улсын ШУА-ийн харьяа болон Их, дээд сургуулийн харьяа Хүрээлэнгүүдийн эрдэм шинжилгээ, судалгааны ажилд нь өндөр амжилт, эрүүл энх, аз жаргал, хамгийн сайн сайхан бүхнийг хүсэн ерөөе.

ШУТИС-ийн харьяа Уул уурхайн хүрээлэнгийн захирал                                    Л.Орхон